Даночните одделенија на Управата за јавни приходи во Прилеп, Охрид, Гостивар, Кичево, Струмица, Куманово, Велес и во Гевгелија, од први јануари ќе работат со продолжено работно време до 18 часот во работните денови и до 14 часот во сабота.
„Поради совпаѓање на работното време на голем дел од физичките и на правните лица со работното време на УЈП, странките често немаат можност во текот на предвиденото работно време да ги завршат своите обврски. Од тие причини, го продолжуваме работното време на шалтерите на УЈП со што нашите услуги ќе бидат подостапни за граѓаните и за фирмите“, стои во соопштението од УЈП, објавено на нејзината интернет-страница.
УЈП потсети дека продолженото работно време за регионалните дирекции на Управата за јавни приходи во Скопје, Битола, Штип, Тетово и во Кавадарци почна да се применува од 1 октомври 2014 година.