По повеќе од две години судски процес, Апелациониот суд ја потврдил пресудата на Основниот граѓански суд Скопје во корист на актуелниот премиер Христијан Мицкоски, во случајот за клевета против претседателот на ЦИВИЛ – Центар за слобода, новинарот и активист за човекови права Џабир Дерала. Пресудата, според реакцијата на ЦИВИЛ, претставува директен атак врз слободата на изразување и медиумските слободи во земјата.
Судскиот процес беше покренат од страна на Мицкоски, во периодот кога тој беше лидер на опозициската ВМРО-ДПМНЕ, а случајот го водеше неговиот тогашен соработник, а сега министер за внатрешни работи, Панче Тошковски. Тужбата се однесуваше на текст кој Дерала го презел од друг медиум, што според ЦИВИЛ уште повеќе ја доведува во прашање суштината на самата постапка.
Инаку, станува збор за напис во кој се тврди дека тогашниот лидер на опозицијата а сегашен премиер Христијан Мицкоски купил и реновирал куќа во Козле вредна еден милион евра.
По објавата на текстовите, Мицкоски на социјалните мрежи побара извинување и тоа токму на православниот празник Прочка во 2023 година.
Како што напиша тогаш Мицкоски, семејниот дом на неговиот зет, сестра и внука, „создаден со продаден имот добиен како наследство и подигнат банкарски кредит“ бил претставен како негов скриен имот. Ако не го сторат тоа, најави дека ќе ја бара правдата преку судски процес.
Повеќе од две години подоцна, од ЦИВИЛ велат дека пресудата против Дерала е „јасен показател за тесната спрега меѓу извршната власт и судството, и сериозно го нарушува начелото на медиумска независност и критичка јавност“.
Од ЦИВИЛ сметаат дека случајот претставува предупредување за сите новинари, уредници, активисти и јавни личности кои критички се осврнуваат кон власта, и оти со ваквите процеси се испраќа порака дека секој што не се вклопува во наративот на владејачките структури ќе се соочи со репресија.
„Слободата на изразување не е луксуз, ниту подарок од власта – таа е неприкосновено човеково право“, велат од организацијата, додавајќи дека замолчувањето на новинарите значи замолчување на вистината и дозволување на лагата да преовладува во јавниот дискурс.
