ЦИВИЛ повикува на свесност и совесност кај населението во пресрет на новогодишните празници и потсетува дека петардите и славеничкото пукање се опасни по здравјето и животот.
„Децата се најчести жртви на повреди, трауми и несакани трагедии од употребата на распрскувачки материјали и несовесна употреба на оружје. Кога несовесни лица го злоупотребуваат оружјето за славеничко пукање, одговорните родители треба да им кажат три едноставни безбедносни правила на своите деца: да се оддалечат од местото на славеничко пукање да не допираат оружје или експлозиви и да пријават незаконска употреба на оружјето. Но, и да им објаснат дека тие правила важат и за возрасните, дури и на најголемите професионалци со дозвола за употреба на оружје и распрскувачки материјали може да им се случи да погрешат“, велат во ЦИВИЛ.
Тие потсетуваат дека има многу примери на трагични завршетоци на прослави и веселби кога заскитан куршум убил или повредил случаен минувач или учесник на прославата.
„Во еден прирачник на ЦИВИЛ за едукација на деца и млади за безбедно однесување се вели: „Петардите и распрскувачките материјали, како и оружјето се опасни и често предизвикуваат трагедии дури и во редовите на професионалци на кои во описот на работното место им е ракување со експлозиви и оружје.“ ЦИВИЛ потсетува дека домашните миленици се посебно сензибилни на звуците од распрскувачките материјали и петардите“, велат оттаму.
