Македонскиот државен и партиски врв по повод празникот Воскресение Христово Велигден денеска упати честитка до православните христијани и до поглаварот на Македонската Православна Црква – Охридска Архиепископија г.г. Стефан.
Претседателот Стево Пендаровски во упатената честитка наведува оти се надева дека Велигден ќе ни донесе добра мисла, оптимизам и инспирација за правење добри дела и помагање на сите на кои им потребна помош и поддршка без разлика на религиската или етничката припадност.
„Празникот на христовата победа над смртта има посебно место во срцето на секој христијанин и инспирира вера, надеж и љубов. Посакувам овие празнични денови да се посветиме на најблиските и да даруваме насмевки, ведрина и оптимизам. Заедно да придонесеме за просперитетот, напредокот и благосостојбата на нашата татковина“, се вели во честитката од претседателот Пендаровски.
Премиерот Димитар Ковачевски упати писмо со честитки до г.г. Стефан, свештенството, монаштвото на МПЦ-ОА и до сите верници.
„Во овие времиња на војна на европскиот континент и на светска економска и енергетска криза, повеќе од потребна е обновата на гласот на совеста кај секого и издигнување над лични интереси, со цел заедно да ги осигураме просперитетот и перспективите на сегашните и идните генерации“, стои во писмото на премиерот Ковачевски.
Честитка по повод празникот Воскресение Христово – Велигден упати и министерот за внатрешни работи Оливер Спасовски.
„Од сето свое срце, посакувам мир, здравје, хармонија во секој дом“, се наведува во честитката од министерот Спасовски.
Христијанскиот празник Велигден на сите верници денеска им го честиташе и лидерот на ВМРО-ДПМНЕ Христијан Мицкоски, кој им посака безброј мигови на среќа, на спокој и на љубов на сите верници.
„Добрината и љубовта нека биде водилка во вашите срца, а светлината и топлината нека бидат присутни во сите наши домови“, гласи честитката од опозицискиот лидер Мицкоски.
