Петмина од вкупно осумтемина осомничени во вчерашната акција на МВР на Економскиот факултет при УКИМ се приведени во полициската станица Кисела Вода и денеска ќе бидат изведени пред судија на претходна постапка, додека на другите тројца, Т.Ф., С.Д. и Љ.Ј. во текот на денот ќе им бидат испратени покани за распит во Основното јавно обвинителство за гонење организиран криминал и корупција, изјави денеска министерот за внатрешни работи, Митко Чавков.
Тој не сакаше да каже дали меѓу осомничените е и претседателот на МАНУ, чие име и преземе се совпаѓа со осомничениот со иницијали Т.Ф., посочувајќи дека „важно е да се запази начелото на презумција на невиност“.
Чавков соопшти дека истрагата за случајот почнала во 2014 година по добиени криминалистичко-разузнавачки информации и пријави од студенти.
Во случајот осомничени се шестмина професори на Економскиот факултет, еден демонстратор и сопственик на бифето, кои се товарат за кривичните дела примање поткуп, примање награда за противзаконито влијание и давање поткуп.
Еден од осомничените неофицијално е професорот и поранешен декан на Економскиот факултет, Бобек Шуклев, кој беше приведен вчера.
Осомничените, како што објасни министерот, од студентите барале од 500 до 1.000 евра за да им напишат преодни оценки, а имало и случаи кога студенти добиле оценки иако немале право да полагаат или воопшто го немале пријавено предметот во испитната сесија.
– Во некои од случаите шемата била разработена така што сопственикот на бифето поткупот во вид на парични средства го земал директно од студентите, а потоа го предавал на асистентот, за истиот да ги даде на професорите за тие во индексите на студентите да впишат преодна оценка 6 за предметите што ги предаваат и покрај тоа што истите не го поседуваат потребното знаење за положување на испитот – рече министерот Чавков.
Полицијата вчера извршила претерси во 13 домови, во четири професорски кабинети, во бифето и во студентските прашања на Економскиот факултет.
При претресот на возилото на еден од осомничените биле пронајдени 1.000 евра, односно 16 банкноти од 50 евра и 2 банкноти од 100 евра, кои, како што рече Чавков, се предмет на кривично дело.
Кај дел од другите осомничени биле пронајдени и одземени мобилни телефони, индекси, пријави за испит, а од просториите на студентски прашања биле одземени 17 досиеја на студенти.
– Исто така, при претресите пронајден е нотес во кој се содржани податоци од студенти, матични броеви и слично – посочи Чавков.
Запрашан дали има сознанија за вакви злоупотреби на други факултети, Чавков не сакаше да одговори конкретно и рече дека не исклучува таква можност и дека во наредниот период е можно и други студенти да пријават вакви случаи.