„Очигледно, во тек е акција за формирање паралелна организација која, по теркот на МАН, треба да биде пандан на автентичната медиумска организација, во случајов ССНМ, и да ги релативизира работите. Станува збор за добро проверен метод на криминална злоупотреба на демократските форми, нешто што со години наназад гледаме дека се случува“, изјави Тамара Чаусидис, претседателка на Самостојниот синдикат на новинари и медиумски работници на прес-конференцијата пред Клубот на пратеницитe.
– Тоа не би било спорно доколку тоа „делење“ не е условено со закани од непродолжување на договорите, намалување на платите или во подобрата варијанта – ветување дека членарината за синдикатот ќе биде плаќана од самиот медиум. Ние сме за синдикален плурализам, но, сепак, шпекулациите дека на новинарите им се давале пристапници со тоа што им било укажувано дека членарината нема да мора да ја плаќаат воопшто, индицира од каде е, всушност, потребата за нов синдикат – рече Чаусидис.
Таа претпоставува дека уште една причина за ова е и тоа што еден од предлозите за кои се преговора е и улогата на новинарските здруженија и на синдикатот.
