По замрзнувањето на цената на белиот и полубелиот леб на 33 денари од почетокот на март, министерот за економија Крешник Бектеши најавува дека од утре ќе се замрзнат цените на тестенините, при што тој очекува во маркетите овие производи да се продаваат по цени пониски за над 10 отсто.
Бектеши денеска најави дека се во постојана комуникација со производителите на млечните производи, додавајќи дека ќе почека до утре наутро за да види дали и колку ќе се намалат цените на млекото, урдата и белото сирење. Тој додаде дека дел од компаниите се одлучиле веќе самите да ги намалат цените на овие производи.
„Граѓаните да бидат спокојни, цените ќе бидат намалени не само на овие производи, ние во континуитет ќе продолжиме со сите производи каде што ќе покажат анализите дека има поголеми профити или маржи од она што е редовно“, изјави Бектеши.
Вицепремиерот задолжен за економски прашања, координација на економските ресори и инвестиции, Фатмир Битиќи во синоќешното гостување во емисијата „10 Минути“ што се емитува на ТВ21 изјави дека и покрај сите мерки за помош на граѓаните и на компаниите, продолжила тенденцијата за раст на цените, што ја приморала Владата да интервенира со замрзнување на цената на лебот, бидејќи интересот на граѓанинот мора да биде на прво место.
Инаку, вицепремиерот Битиќи информираше рече дека владата на вчерашната седница донела одлука за дополнителна помош, така што ги укинала царинските давачки за тестенините и на производите кои влегуваат во палетата основни прехранбени производи.
Битиќи додаде дека оваа нова владина мерка ќе придонесе за намалување на цените, потсетувајќи дека владата веќе ја субвенционира електричната енергија за производителите на основните прехранбени производи.
