Царините на Трамп ги урнаа берзите ширум светот, ЕУ ќе гласа за воведување „одмазднички царини“

Новите царини што САД ги воведуваат за приближно 60 земји во светот, вклучително и онаа од 104 отсто за Кина, влегоа во сила. Царините го разнишаа глобалниот трговски поредок кој опстојува со децении, ги зголеми стравувањата од рецесија и избриша трилиони долари од пазарната вредност на големите фирми

Кина е најтешко погодена од царините, но не покажа знаци на повлекување , ветувајќи дека ќе води трговска војна „до крај“ и ветувајќи контрамерки за одбрана на своите интереси. Одмаздничките царини на Кина од 34% за американските стоки треба да стапат во сила денес, пишува Гардијан. 

Трамп во вторникот рече дека неговата влада работи на „прилагодени договори“ со трговските партнери, при што Белата куќа рече дека приоритет ќе им даде на сојузниците како Јапонија и Јужна Кореја. Неговиот највисок трговски функционер Џејмисон Грир, исто така, изјави пред Сенатот дека Аргентина, Виетнам и Израел се меѓу оние кои понудиле да ги намалат нивните царини.

Трамп на вечера со колегите републиканци во вторникот вечерта рече дека земјите „се очајни“ за да постигнат договор.

Портпаролката на Белата куќа, Каролин Левит, вчера рече дека околу 70 земји и пристапиле на администрацијата на американскиот претседател Доналд Трамп со барање за почеток на трговски преговори.

ЕУ подоцна денес ќе гласа за воведување одмазднички давачки за 21 милијарда американски стоки, вклучувајќи земјоделски производи, шминка, челични делови и пластика, како првиот чин на одмазда на Европа против царините на Доналд Трамп.

Разгледуваат царини од 25 отсто за голем број стоки од бадеми до јахти, според документот што го видел „Гардијан“, а првпат го објави Ројтерс. Повеќето од тарифите ќе важат од 15 мај, освен ако не бидат блокирани од големо мнозинство земји-членки.

Мерките се одговор на американските царини за челик и алуминиум, објавени од Трамп во февруари. ЕУ избра стоки што лесно може да се набават од друго место, додека некои цели имаат за цел да нанесат политичка болка на клучните републикански држави. Европската комисија, на пример, сака царини за американска соја, која изобилно се одгледува во Луизијана, родната држава на претседателот на Претставничкиот дом Мајк Џонсон.

Портпаролот на Европската комисија во вторникот рече дека втората фаза од одговорот на ЕУ – одмазднички мерки како одговор на тарифите за автомобили и опсежните „реципрочни тарифи“ објавени на 2 април – ќе биде претставена „на почетокот на следната недела“.