Министерот за надворешни работи Бујар Османи, денеска официјално ја претстави можноста носителите на МКарта да имаат експресно завршување на процедурите на аеродромите во Скопје и Охрид, при влегување во земјава.
Проектот МКарта беше пoчнат во мај 2021 година, како признание и потврда за истакнати личности или поединци од земјата кои живеат во странство, а кои со својата работа и професионалност покажале истакнат успех, а со тоа и промоција на Северна Македонија во странство.
„Проектот МКарта преставува мрежа на наши квалитетни поединци во дијаспората, кои со својата стручност и нагласен ангажман се истакнуваат во новата средина во која живеат, што ги чини вистински амбасадори кои на најдобар можен начин ја претставуваат Северна Македонија. Забрзаниот премин на нашите аеродроми, кое се реализира во соработка со МВР, претставува симболично препознавање на нивниот труд и квалитет и благодарност на нашите институции и држава“, порача Османи.
Тој објасни дека меѓу носителите има научници, лекари, бизнисмени, културни работници итн., за кои имаме желба и интерес да бидат дел од нашиот севкупен развој и општествени процеси.
Дипломатско-конзуларните претставништва на државата во странство се задолжени да ги детектираат таквите поединци, а изборот кој ќе биде носител на МКарта се реализира во строго предвидена процедура. Досега таква можност добиле 69 наши државјани, припадници на дијаспората, тврди Министерството за надворешни работи..
