Бугарското Министерство за надворешни работи (МНР) вчера остро реагираше на последните измени на Законот за здруженија и фондации и на Законот за политички партии што ги изгласа Собранието на Северна Македонија во средата. Според овие измени, бугарските здруженија и клубови „Иван (Ванчо) Михајлов“ и „Цар Борис Трети“ ќе имаат рок од три месеца да ги сменат имињата. Ако тоа не го направат во законски одредениот рок, ќе бидат избришани од Централен регистар.
Бугарските клубови „Цар Борис Трети“ и „Иван (Ванчо) Михајлов“ ќе треба да ги сменат имињата
Во пишаната реакција објавена вчера на веб-страницата на бугарското МНР се вели оти цел на овие измени е „дискриминациско ограничување на правото на здружување на Бугарите во Северна Македонија, за што повод е едностраната интерпретација на историските факти“.
Бугарската дипломатија предупредува дека имало вакви случаи во минатото, за коишто веќе има пресуди против Македонија од страна на Европскиот суд за човекови права (ЕСЧП).
„Легитимниот стремеж за спротивставување на сите форми на екстремизам и омраза не може да биде инструментализиран за намерно ограничување на правата на конкретни заедници. Ограничувањата од ваков карактер веќе им беа наметнати на Бугарите во Северна Македонија во минатото. Со слични аргументи во 2001 година беше забранета организацијата „Радко“, кое е псевдоним на Иван Михајлов. За тоа прашање, ЕСЧП веќе има решение – случајот Радко и Пауновски против ПЈРМ № 74651/01“, пишува бугарското МНР.
Во реакцијата, како што и многупати во последниве десетина години напаѓаа низа врвни бугарски државни функционери, се споменува и комунистичкото минато. Во реакцијата се изнесуваат низа барања до македонската страна. Бугарската дипломатија порачува дека ваквите измени на закони го попречуваат ефективното и целосно исполнување на Договорот за добрососедство меѓу Северна Македонија и Бугарија и се бара властите во земјава да гарантираат на сите незини граѓани, вклучително и тие што се самоопределуваат како Бугари „подеднакви права и слободи“.
Наспроти ваквите барања од бугарска страна, случајот со Македонскиот културен клуб „Никола Вапцаров“ во Благоевград доби судска забрана, исто како и за здружението што го формираше. Во последните 33 години во Бугарија имаше низа институционални и судски забрани за обидите за политичко и културно организирање на Македонците според самосвест од крајниот запад на Бугарија, односно од Пиринска Македонија, за што има пресуди против Бугарија токму од ЕСЧП.
