Управниот одбор на Меѓународниот монетарен фонд (ММФ) ја назначи Кристалина Георгиева за директор на таа институција, откако на сослушувањето таа ги убеди членовите дека е соодветна за позицијата.
Кристалина Георгиева ќе стапи на функцијата на 1 октомври, а како 12. директор на финансиската институција, која е формирана во 1944 година, таа истовремено е и втората жена на чело на оваа институција. Имено, 65-годишната Георгиева, почнувајќи го петгодишниот мандат на почетокот на следниот месец, ја наследува Кристин Лагард, која во 2011 година стана првата жена извршен директор на ММФ.
– Огромна е одговорноста да се биде на чело на ММФ во време кога глобалниот економски раст продолжува да биде фрустрирачки, трговските тензии продолжуваат и долговите се на историски високо ниво. Наш непосреден приоритет е да им помогнеме на земјите да го минимизираат ризикот од кризи и да бидат подготвени да се справат со кризите. Притоа, не смееме да заборавиме на нашата долгорочна цел – поддршка на стабилни монетарни, фискални и структурни политики за градење посилни економии и подобрување на животот на луѓето. Тоа исто така значи и решавање на прашања како што се нееднаквост, климатски ризици и брза технолошка промена – изјави Георгиева.
Георгиева досега беше извршна директорка на Светска банка. Кристин Лагард, пак, ќе биде претседател на Европската инвестициска банка.
