Вторите по ред предвремени парламентарни избори во Бугарија што ќе се одржат на 11 јули носат нови неизвесности. Последните анкети спроведени во јуни и на почетокот од јули покажуват тесна трка во изборните резултати меѓу партијата Има таков народ на Слави Трифонов и ГЕРБ на Бојко Борисов.
Анкетата на агенцијата „Алфа Рисрч“ спроведена меѓу 4 и 7 јули покажува дека за Има таков народ би гласале 21,8 отсто од гласачите, додека ГЕРБ има поддршка од 21,5 отсто. И анкетата на „Галуп“ реализирана од 30 јуни до 7 јули покажува дека расте поддршката на партијата на Слави Трифонов, кој би освоил 21,3 отсто од гласовите наспроти 20,3 отсто поддршка што би добил поранешниот бугарски премиер Борисов.
Ваквите изборни прогнози се поклопуваат и со останатите анкетни истражувања, покажувајќи неизвесна трка меѓу двајцата главни ривали на самиот изборен ден во недела. Кој и да освои повеќе гласови, клучно за исходот од парламентарните избори ќе биде кои од помалите политички партии ќе влезат во бугарскиот парламент.
Бугарската социјалистичка партија (БСП) во последните анкети има околу 16 отсто поддршка од граѓаните кои ќе излезат на гласање, што би значело дека таа би остварила подобар изборен резултат од претходните избори што се одржаа во април. По социјалистите, следува партијата Демократска Бугарија која што би освоила околу 12 отсто од гласовите, а веднаш по неа е партијата на етничките Турци ДПС која е прогнозирано дека ќе освои меѓу 10 и 12 отсто поддршка на изборите.
Меѓу партиите кои би влегле во парламентот е и партијата на Маја Манолева, Исправи се! Мутри надвор, за која се прогнозира дека би освоила меѓу 5 и 6 отсто од гласовите. На прагот меѓу 3 и 4 отсто поддршка на изборите е и националистичката коалиција предводена од ВМРО на Красимир Каракачанов, а слична поддршка од околу 3 отсто има и партијата Преродба формирана од структури кои излегоа од партијата ВМРО.
Ваквата поддршка на политичките партии во Бугарија остава простор за уште една неизвесност околу тоа каква коалиција меѓу политичките партии ќе ја формира новата бугарска влада по 11 јули. Бугарскиот политиколог Георги Кирјаков во изјава за Бугарското национално радио вели дека постојат две сценарија по изборите во недела.
Според првата опција, Кирјаков вели дека би се формирала влада меѓу опозициските партии кои ги предводеа протестите во Бугарија, која би била предводена од партијата на Слави Трифунов. Оваа влада ќе мора да ја поддржи една од постарите партии што досега го држеа приматот – бугарските социјалисти, партијата на Турците или ГЕРБ. Второто сценарио е актуелната преодна влада предложена од претседателот Румен Радев да добие продолжен мандат, со поддршка на партиите кои и досега гласаа за неа.
И политикологот Димитар Ганев во изјава за Бугарското национално радио вели дека идната влада ќе биде експертска и во неа ќе влезат повеќе партии, при што секој од министрите ќе ги претставува бугарските граѓани. Министрите нема да претставуваат портпароли на политичките партии, туку експерти во одредена област.
