Повеќе од 300 британски интелектуалци повикаа на бојкот на Израел поради, како што велат, илегалната окупација на палестинска територија и кршењето на човековите права и слободи.
Британскиот весник „Гардијан“ во денешното издание објави оглас „Наклонетост на британските интелектуалци кон правата на Палестинците“, кој го потпишаа 343 интелектуалци кои живеат и работат во Велика Британија. Меѓу потписниците се и неколку угледни професори од „Оксфорд“ и од „Кембриџ“.
„Како интелектуалци и универзитетски професори во Велика Британија, крајно сме загрижени и вознемирени од израелската окупација на палестинската земја и неприфатливо е израелското кршење на основните човекови права на палестинскиот народ“, се наведува во текстот.
Интелектуалците порачуваат дека нема да соработуваат со израелските институти и образовни институции ниту, пак, ќе учествуваат на какви било конференции или панели организирани, финансирани или спонзорирани од Израел или некој израелски институт.