Министерството за внатрешни работи соопшти дека сношти десет минути пред полноќ го лишиле од слобода 34-годишниот Д.С.А.Д. од Бразил откако при претрес со кучиња му биле пронајдени два килограми кокаин.
Тој е уапсен под сомнение за сторено кривично дело „неовластено производство и пуштање во промет на наркотични дроги, психотропни супстанции и прекурсори“. За време на разговорот во полиција, Бразилецот признал дека граѓани на Македонија го ангажирале да ја донесе дрогата од Сао Паоло за цена од 5.000 евра.
„Врз основа на прибрани сознанија за лица инволвирани во транспортот на дрогата, во содејство со СВР Охрид, по претходно издадена наредба за претрес од судија на претходна постапка од Основен суд Охрид, бил извршен претрес во Охрид кај браќата Ќ.Н.(36) и Х.Н. (28), кои по претресот се лишени од слобода“, соопшти МВР.
Исто така, од страна на полициски службеници од ОВР Струга се извршени претреси на две локации, кај С.К. (36), за кого е распишан и распис за приведување.
Од страна на СВР Скопје до Основното јавно обвинителство за гонење на организиран криминал и корупција денеска ќе биде поднесена кривична пријава против четири лица инволвирани во организирањето и вршење на транспорт на два килограми кокаин.
