Авионски проектил од голем калибар бил пронајден при проширување на пат во близина на Припор, кај кружниот тек пред населбата Цементара, соопшти денеска Дирекцијата за заштита и спасување (ДЗС). Првичните проценки се дека бомбата е со тежина од околу 125 килограми.
Екипи на ДЗС, како што информираат оттаму, се на терен и ги преземаат сите превентивни и безбедносни мерки, а евакуирани се и дел од жителите на населбата.
„Во согласност со стандарните оперативни процедури, Дирекцијата за заштита и спасување со свои стручни и обучени лица ги презема сите превентивни и оперативни безбедносни мерки. Обележан е и заштитен просторот околу проектилот, известени се сите околни субјекти за да го напуштат теренот, а воедно и МВР го обезбедува просторот, соодветно прописите за таа намена“, стои во соопштението на ДЗС.