Вечерва, во рамките на фестивалот „Охридско лето“, во Антички театар, од 21 часот, гостуваат виртуозот на виолина, Стефан Миленковиќ, и неговиот колега, хармоникашот Марко Хатлак, кои ќе го изведат проектот „Танго компас“.
– Проектот „Танго компас“ ќе понуди многу енергија, страст, врвна интерпретација, за големо уживање на фестивалската публика. Најголем ексклузивитет на целиот овој проект е тоа што маестро Стефан Миленковиќ ќе можеме да го видиме и како врвен танчер – вели селекторката на музичката програма, Гордана Јосифова-Неделковска.
Богатиот програмски, илинденски викенд на фестивалот, утревечер продолжува со театарот „Вера Комисаржевскаја“ од Санкт Петербург, Русија, кој ќе ја изведе претставата „Опасни врски“ од Пјер Шодерло де Лакло, во режија на Дејан Пројковски. Претставата доаѓа како добитник на наградата за најдобра претстава и за најдобра режија на Меѓународниот театарски фестивал ФИАТ, во Црна Гора.
В понеделник, на 3 август, концерт ќе одржи „Амира трио“, кое го сочинуваат Мира Медуњанин – вокал од Босна и Херцеговина, Анте Гело – гитара и Звонимир Шестак – контрабас, двајцата од Хрватска.
Синоќа, во предворјето на „Света Софија“, бројната публика уживаше во извонредната театарска игра на актерите од Албанскиот и од Турскиот национален театар од Скопје, со премиерата на претставата „Слуга на двајца господари“.
– Отсекогаш ми се допаѓаше спојот на јазиците во вашата земја, помеѓу Македонците и Турците, Турците и Албанците, Македонците и Албанците, кои меѓу себе одлично се разбираат. Тријазичната димензија на претставата ме исфрли чекор напред зашто овде познавам актери кои ги знаат сите овие јазици – вели режисерот на претставата, Јуџел Ертен.
Со претставата „Слуга на двајца господари“, Албанскиот и Турскиот народен театар одбележаа 65 години од нивното основање.
