Заменик-претседателот на Владата на Република Македонија, задолжен за европски прашања, Фатмир Бесими, денеска во просторите на Секретаријатот за европски прашања, се сретна со известувачот за Република Македонија во Европскиот парламент, Иво Вајгл, со кој разговарал за активностите што се преземаат за спроведување на клучните реформи од европската агенда на земјата.
„Вицепремиерот Бесими истакна дека евро-атлантската интеграција останува еден од клучните стратешки приоритети на нашата земја, а Владата продолжува да работи на спроведување на потребните реформи и мерки за понатамошно правно и институционално приближување кон Европската унија. Дискусијата се фокусираше на активностите што се преземаат за спроведување на клучните реформи од европската агенда на земјата. Европратеникот Вајгл ја истакна својата подготвеност за овозможување понатамошен придонес за поддршка на соработката и за реформските процеси во нашата земја, од аспект на неговиот личен ангажман и од аспект на улогата во Европскиот парламент. Тој, исто така, ја истакна и потребата од целосна имплементација на постигнатиот политички дијалог“, се вели во соопштението од кабинетот на министерот.
На средбата, Бесими му пренел на Вајгл дека во поглед на мигрантската криза, Владата презема активни мерки за решавање на прашањето околу зголемениот број мигранти, кои доаѓаат, главно, од Грција, вклучувајќи контрола на границите, обезбедување здравствена заштита, подобрување на условите во сместувачките капацитети. Тој му укажал дека Македонија, сепак, нема капацитет самостојно да се справи со овој процес со глобални размери и затоа е потребна континуирана поддршка и директна помош од ЕУ.
