На денешната средба со претставниците од Македонската банкарска асоцијација, министерот за финансии Фатмир Бесими оцени дека добро е што финансискиот сектор е стабилен во време на кризата што ја предизвика корона вирусот.

Но, ситуацијата со економијата е сериозна, а за тоа според Бесими, најдобар показател се БДП и јавниот долг, чии проекции се далеку полоши во однос на финансиската криза од 2009 година.

„Сега само во првиот квартал имавме пад на БДП околу 6,5 проценти, а со вториот квартал 12,7 проценти. Значи скоро четири пати падот на БДП е поголем во вториот квартал сега во однос на третиот квартал во 2009 година. Јавниот долг тогаш беше 26,7 од БДП, а сега сме на 39,5 проценти,“ изјави Бесими.

Министерот за финансии како позитивни ги оцени индикаторите за вкупните депозити кои се 5,2 проценти, а кредитната активност е 8,8 проценти раст на годишно ниво.

Од Македонската банкарска асоцијација (MБA) уште еднаш потврдија дека банкарскиот сектор е стабилен, со високо ниво на капитализираност и ликвидност, а сите банки работат со добивка.

Претседателката на МБА, Маја Стевкова-Штериева, се осврна на реализираните и тековните активности на асоцијацијата од почетокот на ковид-кризата до денес.

„Банкарскиот систем во секој момент може да одговори на потребите на граѓаните и компаниите, преку квалитетна и соодветна кредитна поддршка и клучно – преку безбедност за нивните депозити. Тоа се темели на стабилноста и сигурноста на банките, штедилниците и банкарскиот систем,“ истакна Стевкова-Штериева.