Министерството за финансии го подготвува проектот за воведување Интегриран информациски систем за управување со јавните финансии (IFMIS), и очекува неговата имплементација да биде поддржана од Групацијата на Светска банка и од Европската комисија, во рамки на Вториот инструмент за претпристапна помош ИПА-2. Ова го најави министерот за финансии Фатмир Бесими на средбата со директорот на Светска банка за земјава, Масимилијано Паолучи.
„Проектот е од исклучително значење за управувањето со јавните финансии, бидејќи ќе овозможи интегрирано следење на приходите и расходите од нивното планирање до целосната реализација, со што ќе се подобри управувањето со јавните финансии“, истакна Бесими.
На официјалната средба, којашто се одржа во Брисел на 25 февруари 2021 година, беше потенцирано дека со воведување на овој систем ќе се решат повеќе фискални предизвици, вклучително и реалистичното планирање и повисоката реализација на капиталните инвестиции.
„Мерките и политиките коишто се преземаат во насока на поддршка на одржлив и инклузивен раст, се клучни во услови кога се соочуваме со најголемата економска криза досега. Фискалната политика мора да биде во центарот на одговорот на кризата предизвикана од пандемијата на ковид-19“, истакна Бесими.
На средбата била разгледана реализацијата на четиригодишната стратегија на Светска банка, при што било посочено дека наскоро се очекува да започне реализацијата на проектот за локални патишта. Воедно, во собраниска процедура за усвојување е и Законот за задолжување за проектот за енергетска ефикасност во јавниот сектор, во висина од 25 милиони евра, којшто ќе овозможи реализација на Проектот за енергетска ефикасност во јавниот сектор. Проектот се спроведува преку проектната единица на Министерството за финансии за подобрување на општинските услуги – МСИП, со поддршка од Светска банка.
На средбата се дискутираше и за Проектот за модернизација на земјоделството во износ од 50 милиони евра, од кои 46 милиони се заем од Светска банка, а 4 милиони се грант од ЕУ, чија реализација зависи од усвојувањето на Законот за задолжување којшто исто така е во собраниска процедура. Меѓу другото, средбата беше оценета како исклучително важна и од аспект на дискусиите за владините приоритети на среден рок и можностите за нивно кофинансирање.
