Регулаторната комисија за енергетика и водни услуги на Република Северна Македонија (РКЕ) денеска донесе одлука за зголемување на малопродажните цени на нафтените деривати во прoсек за 1,98 отсто, во однос на цените донесени на 8 јуни годинава.
Според денешната одлука, од вечерва на полноќ малопродажната цена на бензинот ЕУРОСУПЕР БС-95 се зголемува за 1,50 денар за литар и ќе изнесува 59,50 денари за литар. Цените на бензинот ЕУРОСУПЕР БС-98, ЕУРОДИЗЕЛ (Д-Е V) и екстра лесното масло за домаќинство (ЕЛ-1) во малопродажба ќе бидат повисоки за 1 денар за литар и според тоа од вечерва на полноќ, ЕУРОСУПЕР БС-98 ќе чини 61,50 денари за литар, дизелот ЕУРОДИЗЕЛ (Д-Е V) ќе се продава за 51 денар за литар и литар екстра лесно масло за домаќинство (ЕЛ-1) ќе чини 40 денари.
Малопродажната цена на мазутот М-1 НС се зголемува за 0,273 денари за килограм и ќе изнесува 24,886 денари за еден килограм.
РКЕ информира дека референтните цени на сите нафтените деривати на светскиот пазар, во споредба со изминатиот седумдневен период, бележат зголемување и тоа кај бензинот во просек за околу 8,254 отсто, кај дизелот зголемувањето е во просек за околу 6,666 отсто, кај екстра лесното масло зголемувањето е во просек за околу 7,820 отсто, а кај мазутот има зголемување во просек за околу 3,479 отсто. Во истиот период курсот на денарот во однос на доларот е понизок за 1,206 отсто.