РЕК Битола | Фото: ЕСМ

Министерот за економија Крешник Бектеши по состанокот на Комисијата за електроенергетска кризна состојба изјави дека земјава до крајот на годината ќе има доволно количина на електрична енергија, а нема да има и поскапување на струјата.

„Сакам да ги уверам сите граѓани дека до крајот на годината нема да има покачување на цената на електричната енергија за домаќинствата. Денеска имав состанок со сите чинители од енергетскиот сектор во рамки на првиот состанок на Комисијата за електроенергетска кризна состојба и согласно сите информации од нивна страна не беше донесена одлука за прогласување на електроенергетска кризна состојба во државата“, истакна министерот за економија.

На состанокот присуствуваа и претставници од најголемиот производител на електрична енергија во земјата, носителот на лиценца за производство на електрична енергија, носителот на лиценца за пренос на електрична енергија, носителот на лиценца за дистрибуција на електрична енергија, Регулаторната комисија за енергетика, еден експерт од областа и претставници од Министерството за економија.

Според министерот за економија, оваа комисија ја свикува тој согласно Уредбата за критериуми и услови за прогласување на електроенергетска кризна состојба, начин на снабдување со електрична енергија, мерки кои што се превземаат во случај на кризна состојба, како и права и обврски на носителите на лиценци за вршење на енергетски дејниости.

Главната задача на оваа комисија е постојано следење, анализирање и проценување на електроенергетската состојба во Северна Македонија и на електроенергетската состојба во соседните земји и има задача да го информира министерот.

„Владата веќе презеде и предвремени мерки, како што беше намалувањето на ДДВ-то. За жал, не помина Законот кој беше предложен од страна на Министерството за животна средина во делот на еколошката такса, за да може што повеќе средства да може да се користат во овие енергетски компании. Но, во моментов сметаме дека нема потреба од мерки, согласно информациите што ги имаме“, изјави Бектеши.

Информациите говорат дека до крајот на годината ја имаме потребната количина на електрична енергија што можеме да ја испорачаме за домаќинствата и за малите потрошувачи. Цените нема да се зголемат, количините се обезбедни. Подготвени сме како Влада да им помогнеме на ЕСМ и МЕПСО во случај ако има потреба да купуваат електрична енергија од слободниот пазар, истакна министерот Бектеши.

Тој исто така нагласи и дека државата ја гарантира цената на струјата, и согласно тоа, таа нема да се промени до крајот на годината.

„Се активираат сите домашни ресурси, од денеска веќе е во функција и вториот блок во РЕК Битола за да се обезбедат вкупните потреби за граѓаните. Преземени сите активности за активирање на третиот блок на РЕК Битола со набавка на дополнителни количини јаглен, со што ќе се активира повторно и ТЕЦ Осломеј, а остварена е комуникација за подготвеност за набавка на мазут за ТЕЦ Осломеј“, кажа министерот.

Бектеши истакна дека состојбата се следи, се одржуваат редовни состаноци помеѓу сите чинители во енергетскиот сектор, со цел изнаоѓање на најоптимални решенија поради проблемот настанат на светските берзи со електрична енергија.