fbpx

Банкарските институции се договорија за одложено плаќање на ратите на сите кредити за граѓаните и за компаниите

-

Поради вонредната состојба со корона вирусот, банкарските институции решија да им излезат во пресрет на граѓаните и на компаниите кои имаат кредитни задолжувања во банките и во штедилниците, од секаков вид. Тие ќе добијат можност за одложено плаќање на ратите, при што банките и штедилниците на граѓаните и на фирмите им нудат повеќе поволности. Тие се: одложување, односно грејс-период за отплата на кредитите, пролонгирање на исплатата на кредитот на подолг период, пониска каматна стапка и друго.

Тоа ќе се однесува за сите кредитни производи, потрошувачки, станбени, хипотекарни, автомобилски кредити и друго, за кредитни картички, за дозволеното пречекорување (одобрен минус) и за кредити на фирмите, со цел и во интерес да им се помогне на граѓаните и на компаниите полесно да го пребродат актуелниот шок и да имаат капацитет и понатаму да ги плаќаат обврските.

„Народната банка и Министерството за финансии донесоа Уредба за промена на веќе договорените услови за кредитите на граѓани и фирми со која се утврдува како банките и штедилниците можат во вонредната состојба, да им понудат одложување на исплатата на ратите и други поволности. Уредбата е подготвена од Народната банка, Министерството за финансии и Македонската банкарска асоцијација, а е со цел да се олесни финансискиот товар на граѓаните и на фирмите коишто заради корона-кризата се соочуваат или би можело да се соочат со реални потешкотии во исплатата на кредитите во банките и штедилниците“, се вели во нивното заедничко соопштение.

Се нагласува дека со Уредбата се овозможува плаќањето на кредитите да се изврши побрзо и поедноставно, без да се загрози јавното здравје, без да се посетуваат експозитурите и филијалите и без да се чека во ред на шалтерите заради потпишување на анексите на договорите.

„Банките и штедилниците можат да понудат поповолни договорни услови и без претходно да имаат добиено барање од засегнатите клиенти, и тоа преку: објава на своите веб-страници со понуда за промена на условите за плаќање на кредитите или со одделно известување на клиентите, преку електронска или писмена комуникација.

Ако физичките и правните лица, во рок од десет дена од добивањето на понудата, писмено или електронски не ја известат банката – штедилницата дека го одбиваат понуденото олеснување на финансискиот товар, ќе се смета дека понудата за промена на договорните услови е прифатена“, стои во соопштението.

Останува и правото на кредито-корисниците да се обратат до банките и штедилниците, доколку оценат дека има потреба од тоа, но предвидено е тие да можат се обратат електронски или писмено, а одговорот ќе го добиваат преку електронска комуникација.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Посебен сообраќаен режим в недела заради атлетска трка на Средно Водно

Во недела, со почеток во 9 часот, поради атлетска трка на 10 километри, со траса на движење од долниот паркинг на Средно Водно по регионалниот пат (Р2138) до паркингот...