Ограничувањата на протекот на мигранти воведени во Европа за запирање на бегалскиот бран, се спротивни на меѓународното право и на општочовечката пристојност, изјави генералниот секретар на ОН, Бан Ки-мун.
За време на посетата во Мадрид, тој изрази загриженост од ограничувањата на патот на мигрантите и рече дека секој кандидат за азил има право на индивидуално разгледување на неговото барање за азил.
Оваа изјава на генералниот секретар на ОН доаѓа откако грчката полиција рече дека 10.000 бегалци, од кои повеќето Сиријци и Ирачани, се блокирани на граничниот премин Идомени со Македонија и оти се влошуваат тамошните услови. Неколку земји од т.н. балканска рута, пред сè Австрија, воведоа ограничувања за бегалци во последните 10 дена и тоа предизвика метеж од мигранти на границата на Грција со Македонија и во самата Грција.