Дезинформацијата дека починал воениот злосторник Ратко Младиќ проструи бргу низ медиумите во Србија, Босна и Херцеговина вчера, но по само неколку минути, откако се утврди вистината, почна и масовно бришење текстови, пишува црногорскиот сервис за борба против дезинформациите raskrinkavanje.mе.

Дезинформацијата произлегла од Твитер-профил со име Bisera Turković – potpredsjednica Vladе i ministarka spoljnih poslova Bosne i Hercegovine – zvanični nalog, кој бил отворен на 10 февруари, а првиот твит бил објавен вчера. Неговата содржина била дека амбасадорот на Босна и Херцеговина во Хаг ја известил наводната Турковиќ дека починал Ратко Младиќ.

Потоа бил објавен и друг твит на наводниот профил, кој велел дека претседателот на Меѓународниот суд на правдата А. А. Јусуф на Турковиќ ѝ ја потврдил веста за смртта на воениот злосторник Ратко Младиќ.

Сепак, подоцна е утврдено дека Твитер-профилот под името на Бисера Турковиќ го отворил италијанскиот новинар Томасо Дебенедети, кој е познат креатор на лажни вести и на лажни Твитер-профили, и кој кажува дека тоа го прави за да покаже дека денеска е лесно да ги измамиш медиумите, пишува raskrinkavanje.mе.

Веста за смртта на Младиќ ја демантирале неговиот син и Меѓународниот резидуален механизам за кривични судови.

„Овој случај уште една покажа дека во екс-ЈУ просторот владее „копи-пејст“ новинарство, во кое новинарите не проверувајќи ги изворите на информации и нивната кредибилиност, ги објавуваат, копираат, и така придонесуваат за ширење дезинформации“, пишува raskrinkavanje.mе.