Џо Бајден го искористи својот прв говор откако ја напушти функцијата и Белата куќа за да ги критикува социјалните политики на администрацијата на Трамп, пренесува Би-Би-Си.
Поранешниот американски претседател зборуваше на конференција во Чикаго, каде што изјави дека владата „удрила со секира“ по Социјалното осигурување – систем за кој Доналд Трамп и Илон Маск, кој ја води иницијативата за кратење трошоци во Белата куќа, тврдат дека е погоден од измами. Администрацијата има намера да го намали персоналот на агенцијата што годишно исплаќа бенефиции во вредност од 1,6 трилиони долари.
Бајден не го спомена Трамп по име за време на својот говор, но изјави: „За помалку од 100 дена, оваа нова администрација направи толку огромна штета. Тоа е навистина здивозапирачки.“ Тој го опиша социјалното осигурување како „свето ветување“, додавајќи: „Знаеме колку многу значи социјалното осигурување во животот на луѓето.“
Бајден – кој говореше на настан за правата на лицата со попреченост – не се осврна на своето заминување од Белата куќа, ниту на претседателските избори во 2024 година. Агенцијата за социјално осигурување (SSA) обезбедува основен приход за луѓето во САД кои се пензионирани или не можат да работат поради попреченост. Таа опфаќа околу 67 милиони Американци, главно постари лица.
Демократските политичари повеќепати ја обвинуваа администрацијата дека планира радикални кратења на Социјалното осигурување. Членови на т.н. Оддел за ефикасност во владата, воден од Илон Маск, уште од февруари прават кратења во агенцијата, со цел да отпуштат 7.000 вработени. Маск го опиша социјалното осигурување како „најголема Понзи шема на сите времиња“.
Сепак, Трамп претходно изјави дека, иако има намера да се справи со измамите и исплатите на нелегални имигранти, нема да прави сеопфатни кратења на бенефициите. Тој потпиша наредба со која се забранува нелегалните имигранти и „други неисполнувачи на условите“ да добиваат социјално осигурување.
Пред говорот на Бајден во Чикаго, портпаролката на Трамп, Каролин Левит, им изјави на новинарите дека претседателот е „апсолутно сигурен“ дека ќе ги заштити бенефициите за „граѓани кои плаќаат даноци и постари Американци што го почитуваат законот“.
