Постојката за јавен превоз до судот во Тетово сè уште останува без соодветни клупи за патниците. Во недостаток на клупи и грижа од Јавното транспортно претпријатие, граѓаните импровизираат со столчиња што си ги носат од дома, пишува Порталб.мк.
Клупите се многу потребни за постарите лица кои чекаат автобус, но и за тие што не можат да стојат долго време на нозе.
Побаравме објаснување од Јавното претпријатие „Тетово Транспорт“ за тоа зошто на оваа постојка не се поставени клупи и кога ќе се постават истите. Оттаму имаа проблем со електронската пошта и не беа во можност да ги примат нашите прашања. Откако контактиравме преку телефон, истите ги испративме на друга мејл адреса. Но, независно од ова, одговор не добивме. Од претпријатието преку телефон ни рекоа дека имаат проблем со интернетот и дека одговор ќе ни испратат утре.
Порталб.мк потврди дека другите постојки на јавниот транспорт долж булеварот „Илира“ и „Илинден“ се опремени со соодветни клупи.
Оваа проблематика, Порталб.мк ја третираше во септември и октомври минатата година, кога на ниедна од постојките немаше поставени клупи. Потоа, во декември минатата година, јавното претпријатие „Тетова Транспорт“ постави клупи на овие постојки. Но, кај судот, постојката останува без нив. Веднаш откако беа поставени, несовесни граѓани оштетија една од постојките. Една од клупите на една од постојките беше украдена во јануари оваа година.
Овие девет постојки беа поставени пред околу три години, при што една постојка чинела околу 4.524 евра. Деветте автобуски постојки во октомври 2021 година беа заменети со нови стаклени постојки.
