Министерството за здравство на Австрија ја прошири листата на земји од кои е забрането да пристигнуваат летови на австриските аеродроми. Од четврток, 16 јули, Австрија ги стопира сите летови од и кон сите земји од Западен Балкан, вклучувајќи ја и Македонија, а на листата се вклучени и Бугарија, Романија, Молдавија и Египет. На проширената листа од 18 земји веќе се наоѓаат Велика Британија, Португалија, Кина, Белорусија, Русија, Иран, Шведска и Украина.
Ваквата забрана за полетување и слетување од австриските аеродроми кон Скопје и Охрид ќе трае до крајот на јули, а новата одлука на властите во Австрија за повторно воспоставување на воздухопловниот превоз ќе зависи од бројката на активни случаи со ковид-19 во нашата земја.
Одлуката на австриските власти ќе значи дека „Аустриан ерлајнс“ од четврток нема да може да лета на релацијата Виена-Скопје-Виена, додека „Визер“ нема да смее да ги одржува летовите меѓу Скопје и Салцбург, но и меѓу Охрид и Виена.
Според донесената уредба во Австрија, постојат исклучоци, но ова вклучува само „летови во интерес на Австрија“, како и слетување на товарни авиони, авиони што ги пренесуваат болните или ги враќаат австриските граѓани, како и превоз на здравствените работници.
Ваквата одлука на австриските власти доаѓа само неколку дена откако италијанската влада ги откажа сите летови меѓу аеродромите во Македонија и италијанските градови.
