По четири години успешно користење на мерката за авионско засејување на градобијните облаци, оваа година и покрај напорите направени тоа да продолжи, за жал мерката нема да се применува, соопштија Министерството за земјоделство, шумарство и водостопанство (МЗШВ) и Управата за хидрометеоролошки работи (УХМР).
Причината е што немало пријавени фирми на повикот за економски оператор што ќе го врши авионското засејување на облаците за се спречи град.
„Авионското засејување на облаците беше ефикасна метода која успешно се спроведуваше од 2019 та година, со што во повеќе наврати успешно беа спречени штети од град врз земјоделските посеви низ целата територија. За жал, војната во Украина предизвика големо нарушување на светскиот пазар на реагенси кои се користат како компоненти во ракетните горива, поради што ваквите реагенси се дефицитарни и тешко достапни. Управата за хидрометеоролошки работи уредно спроведе постапка за јавна набавка, но за разлика од минатите години, овој пат на повикот не се пријави ниту еден економски оператор“, се вели во соопштението.
УХМР ќе продолжи да ја следи состојбата и веднаш штом пазарот со реагенси ќе се стабилизира, повторно ќе распише нова јавна набавка за активирање на мерката за заштита од град по пат на авионско засејување. Исто така, УХМР на својата веб-страница и преку медиумите редовно ќе известува и алармира алармира за можни временски непогоди, со цел земјоделците навремено да превземат мерки за заштита, објаснува Управата.
