Еден од моторите на авион на „Бритиш ервејс“ денеска се запали на писта во Лас Вегас, додека се подготвувал да полета за Лондон, а поради огнот, патниците морале да се спасат спуштајќи се преку помошните тобогани на итните излези.
Сите 159 патници и 13 членови на екипажот на летот 2276 успеале да излезат од авионот, рече портпаролот на Меѓународниот аеродром „Маккаран“.
Црн чад и пламен се гледале под крилото на авионот, поради што патниците брзо побегнале и потрчале кон пистата пред да пристигнат околу 50 пожарникари и за неколку минути да го изгаснат.
Четиринаесет лица се хоспитализирани поради мали повреди, претежно добиени при спуштањето низ тобоганите.
Американската Сојузна управа за авијација на два часа ги одложи слетувањата на аеродромот во Лас Вегас, бидејќи оштетениот „боинг 777“ на „Бритиш ервејс“ блокирал две од четирите аеродромски писти.