Апелацискиот суд Скопје денеска на затворени седници ги одби како неосновани жалбите за продолжениот притвор на уште седуммина осомничени за насилствата во Собранието од 27 април, минатата година.

Меѓу осомничените чии жалби се одбиени се и пратениците Љубен Арнаудов, Јохан Тарчуловски и Сашо Василевски.

Со денешните одлуки Арнаудов и Василевски остануваат во притвор во истражниот затвор „Скопје во „Шуто Оризари“, додека Тарчуловски останува во куќен притвор.

Минатата недела Апелацискиот суд на јавни и на нејавни седници ги разгледа и ги одби жалбите на поранешниот министер за внатрешни работи, Митко Чавков, на актерот Владо Јовановски, на поранешниот директор на Македонската опера и балет, Игор Дурловски, на Оливер Поповски, Горан Ѓошевски, Мунир Пепиќ, Душко Лазаров, Митко Пешов, Оливер Раудлов, Богдан Илиевски и Илија Славевски, кои остануваат во притвор.

Инаку, Кривичниот суд на 27 декември им го продолжи притворот на вкупно 23 осомничени за насилствата во Собранието, на четворица им беше продолжен куќниот притворо, а на двајца осомничени мерката притвор, на предлог на Основното јавно обвинителство за гонење на организиран криминал и корупција, им беше заменета со куќен притвор.