Новинарот Томислав Кежаровски е осуден на две години затворска казна од Апелацискиот суд, чија одлука денеска била доставена од Основниот суд Скопје 1, соопштија од судот.
Пресудата на Апелацискиот суд следува по жалбата на Кежаровски на провстепената пресуда, со која тој беше осуден на четири и пол годишна затворска казна во случајот „Ликвидација“, а беше обвинет дека го открил идентитетот на заштитениот сведок во случајот со убиството во велешкото село Ореше.
Кежаровски помина пет месеци во притвор, во истражниот затвор „Скопје“, а од ноември 2013 година е во домашен притвор.
Во соопштението од судот се наведени казните одредени од Апелацискиот суд и за дел од останатите обвинети во случајот „Ликвидација“.
- Иле Танев, единствена казна затвор во траење од 1 година и 6 месеци.
- Валентин Зафиров, казна затвор од 2 години и 6 месеци.
- Ивица Ефремов, единствена казна затвор од 3 години.
- Борис Николовски, условна казна од 1 година затвор, која нема да се изврши доколку тој во следните 3 години не стори ново кривично дело.
- Сашо Лазаревски, условна казна од 1 година затвор која нема да се изврши доколку тој во следните 3 години не стори ново кривично дело
Како што соопштуваат од Основниот суд Скопј 1, Апелацискиот суд ги уважил жалбите на обвинетите Иле Танев и Сабедин Џими Хофман за крвичното дело примање поткуп и предметот го вратил на повторно постапување и одлучување само во овој дел.
