По таканаречената афера „Броило“ која ја објави опозициската партија ВМРО-ДПМНЕ и обвини дека премиерот Димитар Ковачевски со својот кум направиле наводен криминал вреден 26 милиони евра во врска со бизнис за производство на струја, Државната комисија за спречување на корупцијата (ДКСК) е со став дека нема основ да се отвори случај.

„Кога стапи на функција заменик министер за финансии, премиерот Димитар Ковачевски во својот анкетен лист уредно пријави сѐ што поседува. Од податоците во анкетниот лист имаме сознанија дека тој не учествува во управувањето, а ги продал и сопственичките удели во фирмата. Оттука нема основ за покренување постапка за утврдување судир на интереси. Согласно Законот за спречување корупција и судир на интереси функционерот кога стапува на функција управувањето на фирмата треба да му го довери на друго лице кое не е член на неговото семејство. Во случајов тој не е ниту сопственик ниту управител“, велат од ДКСК.