Андреа Лидсом се повлече од трката за лидер на британската Конзервативна партија, што ѝ отвора пат на Тереза Меј до премиерската фотелја.
Министерката за енергетика, наводно, ќе се повлече поради преголемиот притисок.
Лидсом денеска јавно ѝ се извини на противкандидатката Тереза Меј поради изјавата дека мајчинството ѝ дава предност во извршувањето на премиерската функција.
На британската политичка сцена изби скандал по повод наводните изјави на Лидсом дека поради фактот што е мајка на три деца, има „голем и реален интерес“ за иднината на Британија.
Весникот „Тајмс“ објави интервју со Лидсом со наслов „Мајчинството ми дава предност над Тереза Меј“, но Лидсом изјави дека таа изјава била погрешно протолкувана и го обвини весникот дека ја извадил од контекст.
Во текстот се цитира Лидсом која, наводно, рекла дека нејзината ривалка во борбата за лидерското место на партијата можеби има браќа и сестри, но дека таа има деца кои ќе имаат деца и кои ќе бидат директни учесници во тоа што ќе се случува во иднина.
Лидсом во обраќањето пред новинарите рече дека е згрозена од начинот на кој тоа било претставено.
Тереза Меј, која нема деца, одби да ги коментира наводните изјави на Лидсом за мајчинството.
