Вицепремиерот за економски прашања, Кочо Анѓушев, денеска од Охрид рече дека владата чека на одобрување нова транша од кредитот од кинеската Ексим банка за интензивирање на изградбата на автопатот Кичево – Охрид.
– Тоа што се очекува сега да се случи е да продолжи кредитирањето од Ексим банка кое престана на 15 јануари. Финансирањето е спорно и тоа не зависи од нас туку од кинеската банка. Деновиве очекуваме информација за тоа – изјави Анѓушев.
Од владата прво ќе го чекаат одговорот на Кинезите за продолжување на кредитирањето, при што вицепремиерот Анѓушев остави простор и за потрага по алтернативни начини на финансирање за довршување на автопатот Кичево – Охрид.
Во меѓувреме, тече тендерската постапка за избор на компанија што ќе ги препроектира утврдените пропусти на овој автопат. Тендерот е отворен до 4 јули, а најдоцна до летото 2020 година ќе се докомплетира проектната документација за делницата долга 57 километри. Автопатот ќе чини 598 милиони евра, а ќе треба да се заврши до јуни 2021 година. Актуелната влада веќе потпиша два анекса со кинескиот изведувач „Синохидро“ за овој проект – едниот за продолжување на рокот за изведба, а вториот за дополнителната сума што ќе треба да се одвои за изградбата на клучки, пристапни патишта, санација на косини и стабилизација на свлечишта, како и за довршување на тунелот „Пресека“.
„Мета“ веќе пишуваше дека Ексим банка наредните денови ќе ја испорача за плаќање и првата рата од кинескиот кредит што беше подигнат во 2013 година за двата автопати. Јавното претпријатие за државни патишта на кинеската банка во текот на јули ќе треба да ѝ ги исплати првичните 22 милиони евра од земениот кредит.
