Братот на убиениот Мартин Нешкоски, Александар Нешкоски, испрати писмо до специјалниот јавен обвинител Катица Јанева, во кое бара „да се отвори постапка за целосно расчистување на прикривањето на убиството на неговиот брат и за утврдување можна инволвираност на други лица во прикривањето на фактите во истрагата и во судската постапка, освен оние кои се наведени во пријавата.“

– На 5 јуни 2015 година, кога навршија четири години од бруталното убиство на мојот брат на партиската прослава на ВМРО-ДПМНЕ, јас и мојата мајка поднесовме кривична пријава до Основното јавно обвинителство Скопје против Дејан Митровски-Урко, Гордана Јанкуловска, Сашо Мијалков и Никола Груевски за кривичните дела злоупотреба на службена положба и овластување и непријавување кривично дело или сторител за нивната инволвираност при прикривањето на истрагата за убиството на Мартин Нешкоски. Пријавата ја поднесовме врз основа на разговорите кои беа објавени во „бомбата“ број 29 на 5 мај и која укажува на кривични дела поврзани и кои произлегуваат од содржината на неовластеното следење на комуникациите. Поради нивните активности и влијание врз истрагата и судската постапка, судот не можеше да утврди одговорност кај Министерството за внатрешни работи и полициските службеници кои службено го ангажирале убиецот Игор Спасов да го обезбедува партискиот митинг на ВМРО-ДПМНЕ. Така, оваа криминална власт го спречи моето семејство целосно да го расчисти убиството на брат ми и да ја добие правдата што му следува, за брат ми да може конечно да почива во мир – вели Нешкоски во писмото.

Тој додадава дека „тоа што се случуваше во периодот на убиството на Мартин беше вистински кошмар на притисоци кои сè уште не завршуваат.“

– Јас сум подготвен да сведочам за тоа и да понудам други сведоци кои можат да ги потврдат моите наводи. Пријавените лица ги злоупотребија сите механизми и сета моќ, кои им беа на располагање на Министерството за внатрешни работи, и успеаја да креираат една лага во која никој повеќе не верува. Во прикривањето на фактите учествуваа многу поголем број луѓе преку фингирање на истрагата, лажно сведочење, различни притисоци и обиди за поткуп, а јас сум сигурен дека правилно спроведената истрага може да ја потврди нивната инволвираност – завршува писмото на Нешкоски.