Претставници на граѓанските организации денеска имаат акции за чистење на падините на Водно и на кањонот Матка.
Под мотото „В џеб, ако нема каде друго!“, волонтери на Движењето за едукација и за унапредување на дијалогот ЛЕАД, денеска ќе ги чистат падините на Водно. Волонтерите со жичницата ќе бидат префрлени до врвот на Водно, а оттаму, пешачејќи до Средно Водно, ќе собираат отпадоци.
Како што информираат од ЛЕАД, ова ќе биде прва од шесте акции што во следните шест месеци ќе се организираат за чистење на падините на Водно.
Освен расчистување на планината, акцијата има цел и да ја зголеми свеста кај граѓаните за зачувување на животната средина. Затоа, активистите ќе носат маици со слоганот „В џеб, ако нема каде друго!“. За време на втората акција ќе бидат поставени и 100 дрвени таблички со истиот слоган.
Чистењето на кањонот Матка е дел од серијата активности на граѓанските организации „Го грин“, „Ајде Македонија“ и „Грашаница“, кои ги организираат со претставници на туристичкиот и на јавниот сектор за чистење отпад во Скопје, Охрид, Демир Капија, Маврово и во Крушево.
