Ако сакаме ефективно да ги заштитиме загрозените животински видови, борбата со криминалот против дивиот свет е клучна. Жалната вистина е дека луѓето кои стојат зад сериозните кривични како труење на диви животни или пак криволов најчесто поминуваат неказнети, додека тоа придонесува да ги повторат делата, a во меѓувреме дивиот свет трпи огромна штета, велат од Македонското еколошко друштво (МЕД)
„Ова се случува зошто жртвите се безгласни и немоќни, сè додека ние не почнеме да се грижиме за нив и да зборуваме во нивно име“, нагласуваат еколозите.
За промена на оваа сурова реалност се залагаат учесниците на Академијата за кривични дела против дивиот свет преку курсеви за обука како да се детектираат, координираат и истражат кривични дела против дивиот свет, а особено труење на диви животни.
По првиот курс, кој во рамки на академијата се случи ова лето во Шпанија, на кој присуствуваа претставници од МЕД, МВР и Факултетот за ветеринарна медицина во Скопје како и невладини организации од Балканот, учесниците повторно се сретнаа во ноември за напредниот курс каде имаа можност да ја подобрат нивната специјализација и експертиза.
Базирано на 15 години искуство, експертите од Регионалната власт на Андалузија и ЕУРОПОЛ беа одговорни за концептуализацијата и спроведувањето на курсот чија цел беше да се обучат државните институции да можат да ги третираат овие кривични дела со сериозноста која ја заслужуваат.
Односно, како што објаснија од МЕД, доколку умре белоглав мршојадец со предавател или пак се појави труп од мечка среде шума, клучните чинители би требало да постапат рутински и да ги преземат потребните чекори за расветлување на случајот.
Учесниците на обуката имаа прилика да научат сè за истрага на местото на злосторството– како да направат систематски истраги и прибирање на доказен материјал користејќи дидактичка логика, а на предавањата беа покриени и низа сродни теми, од прибирање на отпечатоци од прсти, користење тренирани кучиња и тренинг за говор на телото.
Значаен дел од курсот бил посветен и на форензиката која е важен елемент на истрагата каде форензичарите го анализираат доказниот материјал со цел да стигнат до објективни заклучоци за причината на смрт како и гонење на сторителот.
„Единствено заедно може да се бориме против еколошкиот криминал и доколку учиме едни од други“, нагласија од МЕД додавајќи дека Академијата за кривични дела против дивиот свет ќе продолжи да работи посветено на овој сериозен проблем заедно со експертите во оваа проблематика од Европа и пошироко.
Наредната година Академијата ќе вклучи втора генерација учесници од релевантните институции како органите на прогонот, патолози, форензичари, ветеринари и токсиколози а се надеваме дека ќе успее да функционира и во наредните години.
