Во доматите и краставиците нема тешки метали штетни за здравјето на граѓаните, рече на денешната прес-конференција директорот на Агенцијата за храна и ветеринарство (АХВ) Николче Бабовски, додавајќи дека не му е јасно со која цел опозициската партија ВМРО-ДПМНЕ шири паника во јавноста.
„Ширењето лажна паника и тревога е кривично дело, а дали АХВ ќе поднесе пријава ќе знаеме наредните денови“, рече Бабовски.
Бабовски изјави дека негативни се резултатите од анализите за наводно присуство на резидууми од метали и тешки метали.
„Изгледа некој некого излажал или некој помешал микро и милиграми“, рече Бабовски и порача дека кога се излегува да се каже нешто, тоа треба да биде точно и вистинито.
Прашањето за безбедноста на доматите и краставниците се отвори неодамна, а пред два дена Цветан Трипуновски од ВМРО-ДПМНЕ на својот фејсбук профил сподели информација според која олово, кадмиум и арсен се пронајдени во домат и во краставица.
