Ад хок комисијата за следење на медиумите на денешната седница донела одлука да поднесе барање до Агенцијата за аудио и аудиовизуелни медиумски услуги за поведување прекршочни постапки против неколку телевизии и едно радио, поради прекршување на правилата за изборно медиумско претставување на политичките партии.
„Предлози за поведување прекршочна постапка во која судот ќе изрече прекршочна санкција – глоба, привремената комисија достави за ТВ „Нова“ заради непочитување на член 75-ѓ, став 1 и член 76, став 4 од Изборниот законик. Предлози за поведување прекршочна постапка – опомена, Привремената комисија достави за ТВ МТМ и „К3 телевизија“ заради непочитување на член 75-ѓ, став 1 од Изборниот законик и за „Спортско радио“ заради непочитување на член 76, ставови 1 и 2 од Изборниот законик“, стои во соопштението на АВМУ.
Предложените казни се бидејќи овие медиуми подолго емитувале платена политичка програма на политички партии на власт, емитувале изборни реклами во посебни информативни програми, а во случајот на „Спортско радио“ не била почитувана одредбата за јасно одвојување на платеното политичко рекламирање од другите содржини. За ТВ „Нова“ покрај опомена е побарана и парична казна, бидејќи телевизијата го повторила прекршокот.
На денешната седница ад хок комисијата утврдила непочитување на некои членови и од страна на телевизиите „Едо“ и „Шења“.
„Надзорот над ТВ „Едо“ покажа прекршување на член 75-ѓ, став 1, односно во еден реален час емитувано е повеќе од 8 минути платено политичко рекламирање за партиите на власт. Со надзорот над ТВ „Шења“ е констатирано прекршување на член член 77, став 2, кој се однесува на правилата при објавување резултати од испитување на јавно мислење“, се вели во соопштението на АВМУ.
