На почетокот на грејната сезона, 15 октомври, АД ЕСМ, подружница ,,Енергетика” започна со испорака на топлинска енергија за корисниците кои се снабдуваат со греење преку топловодниот систем на „Енергетика“. Тоа се скопските населби Железара, Автокоманда, Триангла, Маџари и Хиподром. Парно греење добија 3.700 домаќинства, детски градинки, основни и средни училишта и деловни субјекти, соопштија од АД ЕСМ.
,,Во „Енергетика” се бележи зголемен интерес за нови приклучувања на системот на парно греење, како од индивидуални куќи, така и од новоизградени станбени згради во овие населби. Поднесени се барања за нови приклучоци што во моментов се во фаза на реализација, бидејќи беа доставени во втората половина на септември и почетокот на октомври, така што бројот на корисници дополнително ќе се зголемува”, изјави генералниот директор на АД ЕСМ, Васко Ковачевски, при денешната посета на ,,Енергетика” и увидот во работите за старт на грејната сезона.
Во однос на проширувањето и реконструкцијата на топловодната мрежа на АД ЕСМ, во завршна фаза е изработката на проектите, а реализацијата се планира за наредната година. Со таа инвестиција ќе се обезбедат нови приклучоци и греење за поширокото подрачје во населбите Железара и Хиподром, како и за поквалитетно греење за постоечките корисници, информираат од компанијата.
Изработката на оваа проектна документација за проширување на дистрибутивната мрежа на топлинска енергија ќе чини околу 9.300 евра.
ЕСМ „Енергетика“ лани имала вкупно 3.740 потрошувачи на топлинската енергија, од кои 3.654 потрошувачи се домаќинства. Овој систем за топлинска енергија може да се шири од Маџари на исток, до населбите Чаир и Бутел на запад, со можност за негово спојување со најмалиот систем за дистрибуција на топлинска енергија на „Скопје Север АД“.