Танос Докос, првиот човек на грчкиот тинк-тенк за надворешна политика ЕЛИАМЕП, прогнозира статус кво за преговорите за спорот за името во 2015 година.
Во колумна за „Катимерини“, Докос забележува дека поради внатрешно-политичките случувања и во Грција и во Македонија спорот најверојатно ќе продолжи да тапка во место.
Докос забележува дека можни се нови притисоци, но не очекува дека тие ќе предизвикаат некакви проблеми за Грција.
– Не се очекуваат драматични случувања во врска со спорот за името со БЈРМ поради внатрешно-политичката ситуација и во двете држави. Ќе има пораст на притисокот за решавање на проблемот, но веројатно ќе биде притисок со кој можеме да се справиме, барем во блиска иднина, затоа што не се разгледува ниту итно проширување на НАТО ниту, пак, се забрзуваат соодветните процеси за проширување во ЕУ – пишува Докос во „Катимерини“.
Генерално, Докос оценува дека Грција и оваа година ќе има големи предизвици и притисоци околу надворешната политика и ќе се очекува, иако политички ослабена поради изборите и политичката нестабилност, да реагира и во врска со класичните прашања од надворешната политика како спорот за името, односите со Турција и кипарското прашање, но ќе мора да биде активна и околу проблемите со Русија и со украинската криза, воените жаришта во Сирија, Ирак и со проблемите со Либија.
