Триесет и шест лица, меѓу кои лекари, адвокат и службени лица од јавни установи, посредувале во добивање туѓа нега и инвалидски пензии, информира Јавното обвинителство. 

„Обвинетите се организирале во две криминални групи, кои во текот на 2023 година и до април 2024 година посредувале и незаконски овозможувале добивање права на туѓа нега и инвалидска пензија, во замена за пари. Цената за овие услуги се движела од 150 до 5.000 евра, зависно од видот и времетраењето на правото што се обезбедувало. Организаторите и припадниците на групите, меѓу кои се и лекари, адвокат и службени лица од неколку јавни установи, користеле своја службена положба и реално влијание за незаконско издавање на медицински мислења и одлуки во корист на барателите на права“, наведено е во соопштението од Обвинителството.

Оттаму додаваат дека по спроведена истражна постапка започната кон крајот на април годинава, Основното јавно обвинителство за гонење на организиран криминал и корупција поднесе обвинителен предлог против 36 лица. Десетмина од обвинетите сториле кривични дела – Злосторничко здружување, кривично дело – Давање поткуп и кривично дело – Примање награда за противзаконито влијание, пет лица сториле кривично дело Злосторничко здружување и кривично дело – Примање поткуп, две лица сториле кривично дело Злосторничко здружување и кривично дело – Примање награда за противзаконито влијание, а останатите 19 лица, се обвинети дека сториле кривично дело Давање награда за противзаконито влијание и кривично дело – Давање поткуп.

„На овој начин, биле заобиколени одредбите од Законот за социјална заштита. Во досегашниот тек на постапката, 13 обвинети склучија спогодби со обвинителството и врз основа на истите, Основниот кривичен суд Скопје изрече пресуди при што првообвинетата е осудена на единствена казна затвор во траење од три години и шест месеци за кривично дело – Злосторничко здружување, кривично дело – Давање поткуп и кривично дело – Примање поткуп, воедно ѝ се одземаат и противправно стекнати 15.000 евра. Останатите кои се спогодија им е изречена алтернативна мерка – условни осуди на казна затвор од 1 до 2 години, која казна затвор нема да се изврши ако обвинетите во рок од три односно пет години не сторат ново кривично дело. Од нив на едно лице му се одзема имотната корист која настанала како резултат на извршување на кривичното дело – надоместок за помош и нега од друго лице во вкупен износ од 36.520,00 денари, а на едно лице противправно стекнатата имотна корист од 2.360 евра и 81.000 денари“, се наведува во соопштението.

Со обвинителниот акт, како што се додава, јавниот обвинител му предложи на судот на обвинетите да им бидат продолжени веќе изречените мерки на обезбедување – мерка притвор за пет лица и мерка куќен притвор за пет лица, а за останатите обвинети мерки на претпазливост.