И покрај тоа што земјава е присутен вториот бран со забрзано ширење на корона вирусот, Министерството за внатрешни работи (МВР) регистрира непочитувања на владините мерки за спречување на ширењето на Ковид-19 од страна на граѓаните. Само во текот на вчерашниот ден, евидентирани се 203 лица низ целата земја кои не го почитувале полицискиот час, при што приведени биле 155 лица, информираат од МВР. За останатите лица се земени податоци, а за сите прекршители на забраната за движење ќе бидат поднесени соодветни кривични пријави.
Во однос на мерката за не носење лична заштита на лицето, само во изминативе 24 часа МВР регистрирало 481 прекршоци и за нив ќе следуваат соодветни парични казни, информираат од МВР.
Во текот на изминатото деноноќие на територијата на земјава на 722 лице им се издадени решенија за изолација, а 185 лица потпишале изјави за самоизолација. Од страна на полициски службеници извршени се контроли кај лица во изолација и самоизолација и не се евидентирани лица кои не ја почитувале мерката за изолација и самоизолација.
Владата на вчерашната седница ја разгледа информацијата за активностите на МВР и на инспекциските служби за контролите и постапувањата во однос на спроведувањето на владините мерки за справување со корона вирусот за време на тековниот продолжен викенд.
„Владата беше информирана дека во текот на наредните два дена ќе биде зголемен бројот на припадниците на министерството на терен, особено во градовите туристички дестинации во земјата“, се вели во соопштението на владината прес-служба.
