Европската Унија ќе ѝ помогне на Македонија со 2,3 милиони евра за проектот „Унапредување на општинското владеење“.

Проектот ќе се спроведува од страна на Програмата за развој на Обединетите нации (УНДП) во партнерство со Министерството за локална самоуправа, Министерството за финансии и општините во текот на наредните 30 месеци.

„Европската Унија континуирано ѝ помага на земјата во процесот на градење на подобра иднина за граѓаните. Овој проект ќе им помогне на локалните власти да испорачуваат јавни услуги со повисок квалитет за граѓаните, со што ќе се придонесе за продобрување на животите на граѓаните“, изјави евроамбасадорот Самуел Жбогар.

Преку проектот, општините треба да ги подобрат постојните услуги, но и да понудат нови во согласност со инклузивните планови за развој. Тие ќе треба да ги развијат своите капацитети за да обезбедат доволно приходи за испорака на сите потребни јавни услуги.

Проектот, исто така, ќе обезбеди финансирање на најмногу 30 општини во висина до 25.000 евра, за да помогне во утврдувањето на приоритетните потреби, а особено на потребите на ранливите групи.

– Сметаме дека со овој проект имаме одлична нова можност да ги поддржиме нашите локални и национални партнери – за општините да имаат доволно средства, капацитети и законски овластувања во исполнувањето на обврските кон граѓаните кои произлегуваат од процесот на децентрализација – изјави постојаниот претставник на УНДП, Луиза Винтон.