Здружението на новинари на Македонија ја поздравува заложбата на Владата за итни медиумски реформи кои ќе се базираат на предлогот подготвен од европскиот експерт Питер Ванхауте и поддржан од ЗНМ, Самостојниот синдикат на новинари и на медиумски работници (ССНМ), Македонскиот институт за медиуми (МИМ), Советот за етика во медиумите во Македонија (СЕММ) и од Институтот за комуникациски студии (ИКС).
Претседателот на ЗНМ, Насер Селмани, на денешната прес-конференција соопшти дека доколку измените на законот бидат на линија на предлогот на Ванхауте, тогаш ЗНМ ќе го поддржи процесот на усвојување на законот.
– Очекуваме Владата брзо и внимателно да го подготви законот. Сега немаме време за губење и за експериментирање. Инсистираме овој предлог да помине во Собранието така како што е предложен, а во наредниот период можеме да отвориме и други прашања, кои се важни за слободата на говорот и за слободата на медиумите – истакна Селмани.
Ванхауте сугерираше Министерството за внатрешни работи да подготви извештај за сите напади против новинарите и да ги изведе насилниците пред лицето на правдата. Тој истакна дека практиката на неказнивост мора да престане.
– Апсолутно е неприфатливо новинар да се држи во притвор три години – рече Ванхауте, посочувајќи го случајот на Зоран Божиновски.
Тој повтори дека неговиот предлог за итни реформи е одлична основа за сериозен напредок во подобрувањето на медиумското законодавство, која ќе ја зајакне независноста и професионалноста на „Македонската радио-телевизија“.
