Во прес-центарот на Бугарската телеграфска агенција – БТА во Софија, на 30 октомври 2014 година, пред стотина присутни писатели, преведувачи и новинари, беше промовирана поетската книга „Зло време“ од македонскиот поет Раде Силјан, во превод на бугарски јазик на Владимир Луков, а во издание на издавачката куќа „Богиана“, чиј главен уредник е Бојан Ангелов, актуелен претседател на Сојузот на бугарските писатели.
За делото на нашиот писател говореше литературната критичарка, академик Благовеста Касабова , која констатира дека „Силјан спаѓа во редот на автентичните поети и дека неговите лирски пораки се со универзални вредности“. На свеченоста по повод промовирањето на поетската книга на македонскиот поет Раде Силјан, Сојузот на слободните уметници на Бугарија му ја додели меѓународната наградата „Амбасадор на пријателството“ за неговиот голем придонес во развојот на бугарско-македонските културни врски.
На чинот на врачувањето на наградата присуствуваа заменикот амбасадор на Република Македонија во Република Бугарија, Гоце Георгиевски, и директорот на Македонскиот културен центар, Васко Шутаров.
