Екипите на зимската служба на Град Скопје во текот на изминатите часови ги поминале сите булевари и улици што се во нивна надлежност, а дополнително со сол се поминати и т.н. „критични точки“, информираат од градската администрација.
Во текот на вчерашниот ден и изутрината на градските улици и булевари фрлени биле 455 тони индустриска сол.
„И во текот на денешниот ден екипите на зимската служба будно ја следат состојбата на градските сообраќајници и ќе интервенираат според потребите согласно со условите на теренот. Градот Скопје им препорачува на возачите да возат внимателно и да се придржуваат на условите на коловозите“, се вели во соопштението.
Од Град Скопје потсетуваат дека во нивна надлежност се булеварите и поголемите градски улици, а дека другите улици се во надлежност на општините и тие се задолжени за нивно чистење и одржување.