Премиерот Зоран Заев учествуваше на дипломатскиот прием организиран од претседателот на Соединетите Американски Држави, Доналд Трамп, во рамките на 72. Генерално собрание на Обединетите нации во Њујорк.
„Дипломатскиот прием организиран од претседателот на САД на ГС на ОН е можност за зацврстување на пријателствата и за идни соработки во интерес на нашите држави“, напиша Заев на „Твитер“.
Дипломатскиот прием организиран од @POTUS на #UNGA е можност за зацврстување на пријателствата и идни соработки во интерес на нашите држави. pic.twitter.com/3JlmSNUYRQ
— Зоран Заев (@Zoran_Zaev) September 21, 2017
Премиерот Заев, во рамките на активностите на Генералното собрание на ОН денеска ќе има билатерална средба со премиерот на Беглија, Чарлс Мишел, соопштија од владината прес-служба.
Заев ќе присуствува и на приемот по повод кандидатурата на Германија во Советот за безбедност на ОН, за периодот 2019-2020 година, што, во име на канцеларката Ангела Меркел, го организира министерот за надворешни работи на Германија Зигмар Габриел.
„Во текот на денот предвидени се и други средби и разговори со влијателни гости на Генералното собрание на ОН, како и со американски политичари и тинк-тенк експерти од сферата на надворешните политики и меѓународните односи на САД“, стои во соопштението на Владата.
