Претседателот на СДСМ, Зоран Заев, денеска се сретна со амбасадорот на Република Франција во Македонија, Кристијан Тимоние.
На средбата била изразена заедничка согласност дека Република Македонија е исправена пред вистинска шанса да зачекори кон стабилна евро-атлантска иднина, во интерес на граѓаните, доколку продолжат демократските процеси во државата.
– Мнозинството граѓани побараа промени на изборите. Околу 612.000 граѓани со пенкало и со глас се спротивставија на режимот и избраа демократски развој на Македонија. Победи концептот на заедништво зад кој застанавме, наспроти концептот на поделби на досегашната власт. Сега е важно волјата на граѓаните да се преточи во институциите – рече Заев.
Лидерот на СДСМ истакнал дека очекувањата на партијата се дека граѓаните ќе добијат нова и одговорна влада, која ќе биде посветена на реформските приоритети од извештајот на Прибе.
