Премиерот Зоран Заев вчера, при посетата на Порој, одговарајќи на новинарско прашање, потврди дека в понеделник ќе ја оствари првата официјална посета на Брисел и првата средба со еврокомесарот Јоханес Хан, на која ќе се договараат првите реформски приоритети што треба да ги реализира новата влада. На првата официјална посета, премиерот ќе биде придружуван од вицепремиерот Бујар Османи, министерот за надворешни работи Никола Димитров и од други владини функционери.
– Во моментот таа посета ни е најважна поради тоа што треба да го постигнеме договорот за првите реформиски приоритети со кои ќе се зафати Владата во согласност со извештајот на Прибе, како и во согласност со извештајот на Европската Унија. Тимовите се подготвени, со засукани ракави, подготвени сме да се втурнеме во процесот на работа. Се надевам дека ќе оствариме средби и со други високи претставници на Евопската Унија, како што се Јункер, Туск, Могерини, за да можеме генерално да ги сублимираме сите очекувања на високите институции на ЕУ за да работите што ќе се спроведат во Република Македонија да бидат прецизни, точни, навремени и во согласност со очекувањата на граѓаните, но, секако, и на ЕУ – рече Заев.
Премиерот појасни дека најверојатно потоа првата посета ќе биде на Бугарија, која на почетокот на следната година ќе го преземе претседателството со ЕУ.
– Веднаш потоа веројатно следува посета на една од соседните земји, јас верувам дека тоа ќе биде Република Бугарија, поради тоа што Република Бугарија ќе биде претседавач со ЕУ од 1 јануари, а е целосно подготвена да ѝ помогне на Македонија како свој сосед во интегративните процеси. Ваквите најави значат засилена активност, сериозно мотивирана прво внатре во државата, а со помош на пријателите од ЕУ и на соседите на Р.Македонија, да ја придвижиме силно Македонија кон полноправно членство во НАТО и во ЕУ – рече Заев во Порој.
